Mundua -
Europako Batzordea
Juncker uztailaren 15ean izendatuko dute Europar Batzordeko presidente
Bozketa uztailaren 16an egitea aurreikusita zegoen, baina egun horretan estatuburuek ezohiko goi-bilera egingo dute Bruselan.
Erredakzioa
Europako Parlamentuko Presidenteen Konferentziak Jean-Claude Juncker Europar Batzordeko presidente izendatzeko bozketa uztailaren 15ean egitea erabaki du, Efe agentziak Parlamentuko iturriak aipatuta zabaldu duenez.
Bozketa uztailaren 16rako aurreikusita zegoen, baina egun horretan estatuburuek ezohiko goi-bilera egingo dute, goi-karguak banatzeko, eta horretarako ezinbestekoa da Europako Parlamentuaren gehiengoak Juncker babestea.
Gauzak horrela, bozketa uztailaren 16tik 15era aurreratzea erabaki dute.
Europako Alderdi Popularrak maiatzaren 25eko hauteskundeak baino lehen iragarri zuen Europako Batzorderako presidentegaia Juncker izango zela.
Joane astean egindako Europako Kontseiluaren bileran 26 herrialderen babesa jaso zuen; Erresuma Batuak eta Hungariak soilik bozkatu zuten Junckerren kontra.
Europako popularrek, sozialdemokratek (S&D) eta liberalek (ALDE) adostuta dute Europako Batzordeko presidentea Juncker izan behar dela, hauteskundeak Alderdi Popularrak irabazi zituela kontuan hartuta.
