Biziarteko kartzela-zigorra ezarri diete Khmer Gorriaren liderrei

Kanbodiako nazioarteko auzitegiak biziarteko kartzela-zigorra ezarri die Khmer Gorriaren bi lider ohiri, gizateariaren aurkako krimenengatik. Erregimen horrek 1,7 milioi hildako eragin zituen 1975tik 1979ra.

Nuon Chea eta Khieu Samphan dira akusatuak. Lehenak 88 urte ditu eta antolakundearen bigarrena izan zen; bigarrena, 83 urtekoa, erregimenaren Estatu-buru ohia da. Biek errefusatzen dituzte karguak eta euren defentsek iragarri dute epaiari errekurtsoa jarriko diotela. Zigorrik handiena ezarri diete.

Epaitegiak, auziaren konplexutasuna eta akusatuen adina eta egoera fisikoa kontuan hartuta, prozesua zenbait zatitan banatzea erabaki zuen. Fase honetan Phnom Penheko nahitaezko ebakuazioa, landa-eremuetako lan-zelaietarako hiri-biztanleriaren deportazioa eta soldadu errepublikanoen hiltzea (1975ean horri ekin zion Khmer Gorriak) epaitu dituzte.

"Askoren enpresa kriminala"

Nil Nonn epaileak bi akusatuak "askoren enpresa kriminal" batean murgilduta zeudela hartu du oinarritzat bere erabakia oinarritzeko. "Enpresa" horren helburua "iraultza sozialista azkarra" ezartzea zen, eta horretarako "beharrezkoa ez zen aurrera jauzi batez" baliatu ziren.

"Milioika lagun izan ziren alderdiaren politikei eta planei jarraitzen zien biztanleria zibilaren aurkako eraso sistematiko baten biktimak", esan du epaileak epaia irakurtzean. Epaiaren arabera, 2 milioi lagun baino gehiagok alde egin behar izan zuten Phnom Penhetik, "eta 500.000 lagun gehiagok herrialdeko beste hiri-eremu batzuetatik joan behar izan zuten, "gezurrezko aitzakiekin, eta mehatxuekin".

Khieu Samphan, dena den, kargu batzuetatik salbuetsi du epaitegiak. Izan ere, bere betebeharra sinbolikoa zen. Baina Nuon Cheak alderdiaren erabakietan parte hartzen zuen; bere abokatuak epaileen zintzotasuna zalantzan jarri du.

Akusazio partikularraren ustez, egun "historikoa"

Akusazio partikularraren abokatuen ustez, eguna "historikoa" da, eta pozik agertu dira epaiarekin; hala ere, esan dute "ezerk ez dituela hildako familiarrak berriko ekarriko".

Pol Pot Khmer Gorriaren burua 1998an hil zen, gerrilla maoistak Kanbodiako iparraldeko ohianean zuten azken bastioian. Lehen bere kideak izandakoek zuten gatibu.