Mundua -
Parte-hartze baxua
Gayen ezkontzak galarazteko galdeketa baliogabetu egin dute Eslovakian
Boto-emaileen % 22k parte hartu zuen, eta, gutxienez, % 50ekoa izan behar zuen parte-hartzea. Halere, % 95 sexu bereko pertsonen arteko ezkontzen aurka agertu zen.
Erredakzioa
Parte-hartze baxuak ( % 22 baino gutxiago) balio gabe utzi zuen atzo Eslovakian homosexualen arteko ezkontzak eta sexu bereko pertsonek umeak adoptatzea debekatzeko erreferenduma.
Galdeketa balekoa izateko, gutxienez % 50eko parte-hartzea izan behar zuen -bi milioi lagun baino gehiago- eta LGTBen kolektiboak bozkatzera ez joateko deia egin zuen, galdeketaren quorumaren kontra egiteko.
Botoen % 99,77 zenbatuta, % 21,33ko parte-hartzea zenbatu zuten, hau da, 900.000 pertsona, Eslovakiako Estatistika Bulegoaren arabera.
Edonola ere, % 95 sexu bereko pertsonen arteko ezkontzen aurka agertu zen; % 92k homosexualek adoptatzeko aukera izatearen kontra bozkatu zuen eta % 90ek seme-alabek hezkuntza sexuala ez jasotzearen alde egin zuten, gurasoak ados ez baldin badaude. Horiek izan ziren erreferendumaren hiru galderak.
Nahiz eta balekoa ez izan, galdeketaren deitzaileek positibotzat jo zuten emaitza.