Egiptoko Kasazio Auzitegiak hiru urtezko zigorra berretsi dio Mubaraki

Egiptoko Kasazio Auzitegiak hiru urteko kartzela zigorra berretsi die Hosni Mubarak Egiptoko presidente ohiari eta haren Alaa eta Gamal semeei, Presidentearen jauregiari esleitutako aurrekontutik dirua bidegabe jabetzeagatik.

Auzitegiak atzera bota du Farid al Dib Mubarak sendiaren abokatuak aurkeztutako helegitea eta, ondorioz, epaia irmoa eta apelaezina da.

Zigortutako hiru gizonak errugabe jotzeko eskatu zion Defentsa abokatuak Kasazio Auzitegiari, alabaina, helegitea aintzat ez hartzeko eskatu zion Egiptoko Fiiskaltzak abenduaren 12an.

Hiru urte espetxean igaro ostean, Alaa eta Gamal aske daude urriaz geroztik.

Mubarak presidente ohiari eta haren bi semeei hiru urteko kartzela zigorra ezarri zien Kairoko Zigor Auzitegiak, presidentearen jauregitik dirua lapurtzea egotzita. Kartzela zigorraz gain, 125 milioi Egiptoko libra (15 bat milioi euro) ordaintzera zigortu ditu; gutxi gorabehera, bidegabe jabetzea egotzitako diru kantitate bera.

Dena den, Mubaraken semeak ez dituzte espetxeratuko hiru urte baino gehiago igaro dituztelako kartzelan. Hala ere, aurrekariak izango dituzte eta, beraz, printzipioz, eskubide politikoak galduko dituzte eta ez dute funtzionario publiko izateko aukerarik izango.

Hosni Mubarakek (87 urte) hiru urte daramatza atxilotuta, baina haren osasun egoera dela-eta, kartzelan baino denbora gehiago igaro du ospitalean.