Mundua -
Spacex enpresa
Bi turista Ilargira joango dira datorren urtean
Lurraren sateliteari buelta emango diote, astebetean, bi turistek. Azterketa fisikoak gainditzen dituztenean ezagutaraziko dituzte haien izenak.
agentziak | erredakzioa
Bi turistak joan-etorria egingo dute Ilargira 2018. urtean, astebeteko bidai batean, SpaceX enpresa estatubatuarraren Dragon espazio-ontzian, eta NASAren laguntzarekin.
SpaceX-ek zehaztu duenez, bi pertsonak interesa agertu zioten enpresari eta, medikuaren azterketa eta froga fisikoak gainditzen dituztenean, izenak jakinaraziko dituzte.
Biak Dragonen bidaiari bakarrak izango dira. 2018an aireratuko dira, Cabo Cañaberaleko (Florida) 19A plataforma historikotik, hain zuzen, Apolo programan erabili zutena.
Programa horretan hamaika hegaldi egin zituzten, 1968 eta 1972 urteren bitartean, Neil Amstrong eta Buzz Aldrin lehen aldiz Ilargira eraman zituen bidaia barne, 1969ko uztailaren 20an.
SpaceXentzat, urrats berri bat izango da gizakiak Martera eramateko helburua lortzeko.
"Honakoa aukera bat da, gizakiak espazio sakonera itzul daitezen, 45 urte geroago, eta eguzki sistemara gehiagotan joan daitezen", SpaceXek ohar batean azaldu duenez.
