Goseak lehenengo hildakoak utzi ditu Pakistanen

Goseak lehen hildakoak utzi ditu Pakistanen, izan ere, bost haur hil dira Basjam inguruan eta ondorengo egunetan gehiago hil daitezkela ohartarazi du Abdul Sattar&' || 'nbsp; Parlamentariak. Uholdeek kaltetutako sei milioi laguni ez zaie iritsi oraindik inongo laguntzarik, ez janaririk ezta botikarik ere.

Horiek berehala behar dute ura, jana, botikak eta aterpea. Bestela, bi egunen buruan, hildakoen kopuruak nabarmen egingo du gora.

Gainera, herrialde asko isolatuta daude, errepideak eta zubiak guztiz ahutsita eta laguntza soilik helikopteroz jaso dezakete.

"Ez du inoiz horrelakorik ikusi"

Ban ki-moon, Nazio Batuen Erakundeko idazkari nagusia Pakistanen da, uholdeek txikitutako lekuak bisitatzen. Iritsi eta gutxira inoiz ez zuela horrelakorik ikusi esan zuen atzo, izan ere, bi aste dira uholdeek milioika pakistandarrei kalteak eragiten ari direla.

"Naturak eragindako hondamendi asko ikusi ditut mundua zehar, baina horrelakorik, inoiz ez. Uholdeen asunto hau, gainera, ez da oraindik amaitu, asteak igaroko dira dena pasatu arte" esan zuen Banek, Asif Ali Zardari Pakistaneko presidentearekin batera emandako prentsaurrekoan.

NBEko agintaria igande goizean iritsi zen Pakistanera eta hegoaldeko lekurik kaltetuenak bisitatu zituen Punjab inguruan. Bertan, hainbat presa gainezka egitear daude.

Ondoren, Ban Zardari presidentearekin eta Yusuf Raza Guilani lehen ministroarekin bildu zen.

Ban ki-monnen helburua laguntzak ahalik eta lasterren iristea da: NBEk nazioarteko herrialdeei 459 milioi dolar eskatu dizkien arren, momentuz kopuru horren bostena heldu da.

Nazio Batuen azken datuen arabera, uholdeek 14 milioi pertsona kaltetu ditu, 1.343 hil dituzte eta 1.588 zauritu. Pakistango Gobernuak, hala ere, kaltetuen kopurua 20 milioikoa dela esan du.