Nola eraiki eliza bat AEBetan

Erlijio-fundamentalismoaren inguruan hitz egiten dugunean, segituan islamistak etortzen zaizkigu burura. Irango emakumea harrika hiltzera zigortu dutela, edo emakumeen beloaren ingurukoak etortzen zaizkigu burura Islamari buruz hitz egiterakoan.

Baina fundamentalismoa edozein erlijiotan egon daiteke. Erlijio-liburuek diotena ardatz hartuz, bizitza soziala antolatzea izaten da helburua. Fundamentalisten arabera, Koranean, Biblian edo Talmudean idatzita utzi du Jainkoak zer egin behar den.

Ba hain zuzen ere, AEBetan azkenaldian asko ugaritu dira talde fundamentalista kristauak. Han edonork antolatzen du eliza bat. Egin beharreko bakarra, Bibliako pasarte batzuk buruz ikasi eta argia ikusi duzula lau haizeetara esan, hori guztia "amen", "aleluya" eta "Jesusek askatzen gaitu" bezalako esaldiekin lagunduta. Ondoren, izena jartzen diozu elizari, egoitza soziala bilatzen duzu, eta kuotak ordainduko dizuten 100 bat eliztar.

Horrela, agian sinisten duzulako, edo bestela "Islama deabrua da" izeneko liburua idatzi eta saldu nahi duzulako, irailaren 11ko urtemugan Koranak erreko dituzula esaten duzu. Hori egin du Terry Jones izeneko batek, eta lortu du guztiok haren inguruan hitz eginez denbora galtzea.