Korana erretzea 'mauka' da Al Kaidarentzat, Obamaren ustez

Floridako artzain batek Koranaren kopiak erretzeko plana du Irailaren 11ko bederatzigarren urteurrenean eta Al Kaida borrokalari berriak errekrutatzeko erabiltzen ari dela ohartarazi du gaur Barack Obama AEBetako presidenteak. Horregatik, erabakia berriz hausnartzeko eskatu dio erlijio-gizonari Obamak.

"Al Kaidarentzat mauka da hau", adierazi du Obamak ABC katean egindako elkarrizketan. "Indarkeria-bolada izan daiteke Pakistanen edo Afganistanen. Horrek Europako edo Amerikako hirietan eraso suizidak egiteko prest egon daitezkeen borrokalarien errekrutatzea areagotu dezake", aurrikusi du.

Terry Jones Gainesvilleko (Florida) eliza protestante txiki bateko artzainak Koranak erretzeko egitasmoa du larunbatean, terrorismo islamiarrari aurre egiteko. Planak kritika ugari jaso ditu nazioartean.

"Proposatzen ari dena Amerikako balioen erabat aurka doa, herrialde hau askatasun eta tolerantzia erlijiosoaren gainean eraiki delako", azpimarratu du Obamak ''Good Morning America'' saioan.

Interpolaren alerta

Bestalde, AEBetako artzainaren planak direla-eta "erasoak izateko arrisku handia" dagoela iragarri du gaur Interpolek.

Alerta nazioarteko Polizia erakundearen 188 herrialdeei helarazi die, Pakistango agintariek hala eskatuta, komunikatu batean jakitera eman dutenez.

Floridako eliza txikiko artzainaren egitasmoarekin lotu ditu "errugabeen aurkako" eraso posible horiek Interpolek.

Artzainaren erantzuna

Bestalde, Etxe Zuriak hala eskatuko balio ekimena "berriz aztertuko" lukeela adierazi du Terry Jones artzainak.

"Bai, berriz hausnartuko genuke", esan du gaur USA Today egunkarian. Zentzu horretan, Etxe Zuriaren, Estatu Departamentuaren edo Pentagonoaren dei baten aurrean "ez entzunarena egingo" ez dutela azaldu du artzainak.