Mundua -
Krisia Venezuelan
Venezuelako Gobernuak eta oposizioak elkarrizketei ekingo diete berriro
Dominikar Errepublikan bilduko dira gaur negoziazioei berriro ekiteko, Danilo Medina presidente dominikarraren eta Jose Luis Rodriguez Zapateroren babespean.
Agentziak | Erredakzioa
Asteazken honetan bilduko dira Nikolas Maduroren Gobernuaren eta Venezuelako oposizioaren ordezkariak Dominikar Errepublikan, Jorge Arreaza Venezuelako Atzerri ministroak Jean-Yves Le Drian Frantziako Atzerri ministroari jakinarazi dionez. Danilo Medina presidente dominikarraren eta Jose Luis Rodriguez Zapatero Espainiako presidente ohiaren babespean egingo da bilera.
"Asko pozten nau Dominikar Errepublikan elkarrizketei berriro ekingo dietela jakiteak", esan du Le Drianek prentsa-agiri batean. Ildo horretan, elkarrizketek “herrian bertan bizi duten egoeran eragin zuzena izatea” espero duela esan du Frantziako diplomaziaren buruak.
Le Drianek jakinarazi duenez, Frantzia zein EB "begirale" izango dira; izan ere, "elkarrizketa da irtenbide bakarra" eta "Venezuelako herritarrak dira krisiaren biktima nagusiak". Joan den astean Venezuelako oposizioaren talde bati harrera egin ostean, Parisek esan du Maduroren Gobernuaren aurkako zigorren bat ezartzeko aukera ez duela baztertzen.
Le Drianek astelehenean Arreazari jakinarazi zionez, "Venezuelak bizi duen egoera politiko, ekonomiko eta humanitarioagatik arduratuta" dago, eta "elkarrizketak berriro abiatzeko asmoa" duela erakusteko "pauso zehatzak" ematea eskatu dio Nicolas Maduroren Gobernuari.
