Batzar Konstituziogileak udal hauteskundeak egingo ditu abenduan Venezuelan

Venezuelako Batzar Konstituziogileak abenduan udal hauteskundeak egitea erabaki du. Gainera, hitzordu hori baliatuta, Zulia estatuan eskualdeko hauteskundeak egitea aztertzen ari da.

2017ko hauteskunde prozesua abendurako "deitzea eta antolatzea" eta erabakia Gaceta Oficial Venezuelako Gobernuaren egunkari ofizialean argitaratzea agindu du Batzar Konstituziogileak.

Horrez gain, dekretua Tibisay Lucena Hauteskunde Batzordeko presidenteari jakinaraztea erabaki du, eskari hori jasotakoan beharrezko eginbideak bidera ditzan.

Udal hauteskundeak 2017ko bigarren seihilekoan egingo zirela iragarri zuen iaz, urte amaieran, Hauteskunde Batzordeak, legeari jarraituz. Hala ere, oraindik ez dituzte jakitera eman hauteskunde horien inguruko xehetasun guztiak.