Elurrak eta izotzak trafiko-arazoak sortu ditu Parisen

Frantziako Barne Ministerioak Parisen autoa ez hartzeko gomendatu die auto-gidariei, asteazken honetan elur-denboraleak sortu dituen arazoak direla eta.

12 zentimetroko lodiera harrapatu du elurrak Parisko zenbait tokitan, eta 1987tik ez da halakorik gertatu. Ondorioz, atzerapenak izan dira garraio publikoetan eta bertan behera utzi dituzte autobus-linea gehienak.

Frantziako 25 departamendu (gehienak ekialdean) alerta egoeran daude elurragatik, eta hainbat hiritan arazoak sortu dira.

Iragarpenen arabera, eguerdian elurra botatzeari utziko dio Parisen, baina ez Frantziako beste toki batzuetan.