Mundua -
Ekainak 23tik harrapatuta
Thailandiako kobazuloan harrapatutako beste lau ume atera dituzte
Lau adingabeak zonako ospitale batera eraman dituzte, baina osasun egoeraren xehetasunik eman gabe. Dagoeneko zortzi haur erreskatatu dituzte, bi eguneko lan konplexuaren emaitza.
agentzia | erredakzioa
Duela bi aste Thailandiako kobazulo batean harrapaturik geratu zen futbol taldeko lau ume atera dituzte erreskate taldeek. 12 adingabe eta futbol entrenatzailea harrapaturik geratu ziren. Dagoeneko zortzi haur erreskatatu dituzte, bi eguneko lan konplexuaren emaitza.
Daily News bertako egunkariak jakitera eman duenez, lau adingabeak zonako ospitale batera eraman dituzte, baina osasun egoeraren xehetasunik eman gabe.
Erreskateari berriz heldu ondoren, haur bat kobazulotik ateratzea lortu dute larrialdi zerbitzuek, eta ordu batzuk geroago beste bi atera dituzte. Ondoren, laugarren bat erreskatatu dute.
Thailandiako Armadaren SEALak Facebook sare sozialean baieztatu duenez, igandetik astelehenera bitartean, zortzi haur kobazulotik atera dituzte.
The Nation bertako egunkariak jakinarazi duenez, erreskate lanak bertan behera utzi dituzte lau adingabeak atera ondoren.
Lehentxeago, lau ume pasadizo mehe bat zeharkatu ondoren dagoen ganberara heldu direla azaldu dute erreskateko iturriek, operazioaren arriskurik handiena, alegia.
Ganberara heltzeko lau ordu eta urpekarien laguntza behar izan dituzte, erantsi duenez.
