Mundua -
Italia
Lau atxilotu 'Diciotti' ontzian, pertsonekin trafikatzea egotzita
Ontzian zeuden migratzaileek bost egun eman dituzte Cataniako portuan, Italiako Gobernuak ez baitzien lehorreratzeko baimenik ematen; Salvini Barne ministroaren aurkako salaketa jarri dute horregatik.
Agentziak | Erredakzioa
Diciotti Italiako kostazainen ontziak erreskatatutako migratzaileen arteko lau lagun atxilotu dituzte, ustez pertsonekin trafikatzea egotzita. Hiru egiptoar eta bangladeshtar bat dira.
Hain zuzen ere, delitu hauek egotzi dizkiote: pertsonen salerosketarako talde kriminala osatzea, legez kanpoko immigrazioa, sexu-indarkeria eta legez kanpo sartzea.
Igandean, Diciotti ontziko migratzaileek lehen eguna eman dute lehorrean. Azken bost egunak ontzian eman dituzte, Cataniako portuan; izan ere, Italiako Gobernuak ez zien lehorreratzeko baimenik ematen.
Salviniren kontrako salaketa
Migratzaileek Libian jasandako tratu txarrek utzitako arrastoak erakutsi dituzte; horietako hamaika Eritreako emakumeak dira, eta Europarako bidean ontzira igo aurretik bortxatu egin zituzten.
Matteo Salvini Italiako Barne ministroaren kontrako salaketa jarri dute, migratzaileei ontzitik lehorrera jaisteko baimena ez emateagatik; bahiketa eta botere-abusua egotzi dizkiote. Luigi Patronaggio Agrigento hiriko fiskalak Salviniren inguruko ikerketa bultzatu du, eta Erromara joan da, Barne Ministerioko goi-kargudun batzuk galdekatzera.
