Mundua -
Tiroketa Frankfurten
Bi hildako eta bi zauritu Frankfurteko aireportuan izandako tiroketan
Polizia iturrien arabera, biktimen artean AEBetako soldadu bat egon liteke. Antza, gizon bat tiroka hasi da soldaduak bidaiatzen ari ziren autobus barruan.
Erredakzioa
Gutxienez bi hildako eta bi zauritu izan dira gaur Frankfurteko aireportuan izandako tiroketan. Polizia iturrien arabera, biktimen artean AEBetako soldaduak daude.Tiroketa autobus baten barruan izan da eta hildakoak gidaria eta soldadu estatubatuar bat izan dira. Alemaniako poliziak gertakari honekin lotura duen Kosovoko 21 urteko gazte bat atxilotu du.
"Ekintzak terrorismoarekin harremana duen ezin dut argitu une honetan", azaldu du Boris Rhein Hesse estatuko Barne ministroak. AEBetako Armadaren autobus batean tiroketa jazo dela ziurtatu du Fraport aireportuko konpainiaren bozeramaile batek.
AEBetako agintari batek jakinarazi duenez, hildako soldaduak Aire Indarreko kideak ziren eta Britainia Handiko Lakenheath basean zeuden. Britainia Handira bidean ziren soldaduak, hain zuzen ere.