Mundua -
Zauritutakoak 50.000 dira
Libiako gerran 10.000 pertsona hil dira, matxinoen esanetan
Bestalde, NBEk baieztatu du lehen aldiz korridore humanitario bat irekitzea lortu duela, eta elikagaiak banatzen hasi dela.
Erredakzioa
Libiako gerran hildakoak 10.000 dira dagoeneko, eta zauritutakoak 50.000 eta 55.000 artean, Mustafa Abdel Jalil matxinoen buruak Franco Frattini Italiako Atzerri ministroari jakinarazi dionez.
Matxinoek eratutako Gobernuaren burua Erroman izan da gaur, Italiako agintariekin batzartzeko.
Jalilekin bildu baino lehenago Canale 5 telebista-katean egindako elkarrizketan, Frattinik iragarri du Erromak nazioarteko batzar bat antolatuko duela maiatzaren 2an, Libiako egoera aztertu eta konponbideak proposatzeko.
Italiako Atzerri ministroak gaineratu duenez, matxinoek kontrolatzen dituzten eremuetako petrolioa nola saldu ere aztertuko dute.
NBEk korridore humanitarioa ireki du
Bestalde, NBEk baieztatu egin du lehen aldiz korridore humanitario bat irekitzea lortu duela Libian, eta ondorioz, dagoeneko hasi dela elikagaiak banatzen herrialdeko mendebaldean.
Atzo, zortzi kamioi sartu ziren Libian Tunisiatik, eta 50.000 pertsona hilabete batez elikatzeko janaria ekarri dute.
Han zuzen ere, elikagaiak Ilargi Gorriari emango dizkiote, eta Tripolin, Zintan-en, Yefrin-en, Nalut-en, Mezdan, Al Reiban eta Al Zauiyan banatuko dituzte.
UNICEFek ere laguntza bidali du, Misratan banatzekoa, baina oraindik ez da heldu.
