Europar Batasunaren egoera kezkatzekoa da oraintxe

Zatituta dago Libian izan beharreko parte hartzeari dagokionean, kide batek baino gehiagok zailtasun ekonomiko larriak ditu, Tunisiako errefuxiatuak partitzeko orduan ere ezin ados jarri, eta Eskandinabia aldean Europaren kontrako alderdiak goraka doaz, dena da arriskutsu Europar Batasunarentzat.

Libiaren kasuan, Frantzia eta Erresuma Batua jarri dira interbentzio militarraren buru, Belgika, Danimarka, Noruega eta neurri txikiagoan Españaren babesa izan badute ere. Alemania buru, beste kide batzuek ez dute ezer jakin nahi izan.

Tunisiako errefuxiatuen auziak tentsio handia eragin du Frantziaren eta Italiaren artean. Italiako lurretara iristen diren errefuxiatu gehienek Frantziara iritsi nahi dutelako. Italiak behin behinean geratzeko baimena eman die eta hori baliatuz ametitu beharko lituzke Frantziak.

Baina Nicolas Sarkozy presidenteak ez du nahi , inondik ere Fronte Nazionalak boto gehiago kentzea eta ondorioz tunisiarrei muga ixteko agindu du.

Batasun europarra astindu duen beste liskarra Grezia, Irlanda eta Portugali emandako erreskateei lotuta dago. Mailegua egin zaie herrialde hauei, ez dirua oparitu.. baina hala balitz bezala demagogia egin duten alderdiak etekina ateratzen ari dira. Azken adibidea, joan den igandekoa: Benetako Finlandiarrak izeneko alderdiak laukoiztu egin ditu hauteskunde emaitzak, argudiatuz, finlandiarrek ez diotela zertan dirurik eman portugaldarrei.

Aipatu dugun guztia erronka da Europar Batasunarentzat erakunde gisara, eta haratago proiektu europar osoarentzat ere bai.