Mundua -

Venezuela

Juan Guaidoren jarraitzaileak Venezuelak Brasilen duen enbaxadan sartu dira

Guaidoren bozeramaileen arabera, 'funtzionario talde batek borondatez entregatu du egoitza diplomatikoa'. Hala ere, Brasilgo diputatu batek dio talde batek eraikina 'inbaditu' duela.

Juan Guaido. Artxiboko argazkia: EFE
Juan Guaido
Juan Guaido. Artxiboko argazkia: EFE

Agentziak | Erredakzioa

Whatsapp Facebook Twitter Telegram Email

Juan Guaido Venezuelako Asanblea Nazionaleko buruzagiaren eta bere burua presidente izendatu zuenaren jarraitzaileak Venezuelak Brasilen duen enbaxadan sartu dira asteazken honetan, Brasilian.

Maria Teresa Belandriak (Guaidok Brasilen duen ordezkaria) ohar batean adierazi duenez, funtzionario batzuek gaur goizean esan dute "Juan Guaido presidentea onartzen dutela" eta "egoitza diplomatikoa Brasilen legitimoki egiaztatutako ordezkaritzari borondatez" emango ziotela.

Brasilgo Langileen Alderdiko Paulo Pimenta diputatu brasildarraren esanetan, ordez, taldeak eraikina "inbaditu" du goizaldean, eta "nahiko borroka bortitza" izan da Nicolas Maduro presidentearen Gobernuaren defendatzaileen eta aurkakoen artean.

"Brasiliako poliziak edo kantzileria berak gune hori indarrez hartzen saiatu ziren kolpisten ekintza erraztu eta babestu izanaren zantzuak daude", adierazi du Pimentak.

Enbaxadaren barruan dauden Guaidoren aldekoak EFE albiste-agentziari esan diotenez, Polizia Militarra bertan dago, eta uneotan egoera "lasaitasun handikoa" da.

Hau zure interesekoa bada, baliteke beste gai hauek ere izatea
Nazioartea Eguneko albisteak Albisteak Venezuela bideoak Brasil Nicolás Maduro gaur Guaidó azken ordukoa