Mundua -
Atxilotu dute
AEBetako gangster bilatuena hiritar arrunta zen
Ilearen koloreagatik Whitey (zuritxoa) ezizenaz ezagutzen dutena 16 urte ibili da ihesi. Hura atxilotzen laguntzen zuenarentzat 2 milioi dolarreko ordainsaria agindu zuten gainera.
Erredakzioa
James Whitey Bulger 81 urteko gangsterra atxilotu du FBIk. AEBetako hamar gaizkile bilatuenenetako bat zena Santa Monicako (Los Angeles) errenta zaharreko pisu batean bizi zen, eta Poliziak armak eta 800.000 dolar atzeman ditu bertan. Azken hamabost urteetan bizi izan dira Whitey eta Catherine Greig 60 urteko bikotekidea etxe horretan, eta inork ez die inoiz susmo txarrik hartu.
Ilearen koloreagatik jarri zioten Whitey (zuritxoa) ezizena. Guztira, 19 hilketa leporatu dizkiote. Horrez gain, hilketak egiteko konspirazio delitua, estortsioa, droga trafikoa eta dirua zuritzea ere egotzi dizkiote. Hura bilatu eta atxilotzeko agindua 16 urtez izan du indarrean Poliziak, eta aurkitzen zuenarentzat bi milioi dolar agindu zituzten. Bulger Floridan eta Oklahoman ere auzipetu dute.
James Whitey Bulgerren ibilbidean inspiratu zen Martin Scorsese The Departed pelikula egiteko, eta 2007ko Oscarretan saria eman zioten.
Hamarkada bat baino gehiago haren bila aritu ostean, FBIk estrategia aldatzea erabaki zuen eta Greigen bila hastea erabaki zuen.
Atxilotuak epailearen esku utzi dituzte dagoeneko. Oraindik ez dute esan noiz eramango dituzten Bostonera; izan ere, Winter Hill bandaren buru izan omen zen bertan. 1994an alde egin zuen bertatik, FBI atzetik baitzuen.