Pertsona bat hil da Frantziako zentro nuklear batean izandako eztandan

Pertsona bat hil da Marcouleko (Frantziako hego-ekialdea) industriaguneko labe batek eztanda eginda, Frantziako komunikabideek zabaldu dutenez. Oraindik ez dituzte leherketaren nondik norakoak argitu. Enpresako agintariek erradiaktibitate-ihesa izateko arriskua baztertu dute. Zentro nuklearra Kataluniatik 300 kilometrora dago, Avignonetik eta Nizatik gertu. Lau zauritu daude, horietako bat larri.

Le Figaro egunkariak jakitera eman duenez, ezbeharra hondakin erradioaktiboen biltegi batean izan da. Gertakizuna 11:45ean izan da, hondakin erradioaktiboen solairuan, eta “ez du inolako erradiaktibitate-ihesik sortu”, Midi Libre Frantziako egunkariak adierazi duenez.

Industriagunea Rodano ibaiaren ondoan dago, Orange hiritik gertu, Gard departamentuan ( Nîmes du hiriburu).

Segurtasun Nuklearreko Kontseilua, etengabeko kontaktuan Frantziarekin

Segurtasun Nuklearreko Kontseilua "etengabeko kontaktuan" dago Frantziako segurtasun nuklearraren agintaritzarekin, gaur izandako eztandaren ostean. Dirudienez, metala urtzeko intentsitate baxu edo oso baxuko labe batek egin du eztanda. Zentroa 1999tik dago martxan.

Hartutako neurrien artean, Frantziako segurtasun nuklearraren agintaritzak ikuskatzaile talde bat bidali du gertatutakoari buruzko informazioa jasotzera.