Mundua -
COVID-19
1.210 kutsatze gehiago azken 24 orduetan Italian, maiatzetik zifrarik altuena
Beste zazpi lagun hil dira: guztira, 35.437 hil dira pandemia hasi zenetik. Turismoari atea berriro ireki izanak kasu kopuruak biderkatu ditu.
AGENTZIAK | ERREDAKZIOA
Italiako Gobernuak igande honetan jakinarazi duenez, 1.210 kutsatu gehiago atzeman dira azken 24 orduetan. Guztira, 259.345 herritarrek eman dute positibo Italian. Gainera, zazpi lagun hil dira azken 24 orduetan eta, horren ondorioz, 35.437 dira herrialdean hildakoak pandemia hasi zenetik.
Ospitaleratzeei dagokienez, 69 daude zaintza intentsiboetan. 205.470 herritarrek gainditu dute gaitza.
Koronabirus kasu kopuruak behera egin du herrialdean uztail erdira arte (orduan 100 kasu inguru atzeman ziren egunero). Ordutik hona, joera aldatu da eta kasu kopuruek gora egiten jarraitzen dute, distantzia soziala gordetzeko herritarren konpromiso falta eta turismoari atea berriro ireki izana tarteko.
Lazion eta Lombardian atzeman dituzte igande honetako kasu gehienak, eta kasuen % 60a lotuta dago Erromako eta Milango nazioarteko aireportura iritsitako pertsonekin, baita Sardiniatik datozenekin, koronabirusaren epizentroetako bat delako.
