Obamak Europaren kontra jo du

Besterik ez zitzaigun falta, Barack Obama ere demagogian erortzea. Mundu osoa astintzen ari den finantza krisia AEBetan sortu zen eta AEBak dira hori konpontzen jakin ez dutenak. Hala ere, ez zaio arrazoirik falta buruzagi europarrei beharrezko erabakiak hartzea gehiegi kostatzen ari zaiela esaten duenean.

Europako zorraren krisia konpontzeko erabaki oso garrantzitsuak hartu behar dira, denak batera eta oso azkar gainera. Gutxienez honako hau egin beharko litzateke: Europako Banku Zentralak interes tipoak jaitsi eta diru gehiago eta merke jar dezala bankuen esku; Erreskate Funtsaren tamaina edo kopurua handitu eta hori erabil dadila arazoak dituzten herrialdeen zor publikoa erosteko, Greziako, Irlandako eta Portugaleko zorrak gehien eragiten dien bankuak birkapitalizatu. Egokiena eurobonoak sortzea litzateke, Euroguneko 17 herrialdeek elkar hartuta babestutako zor publikoa.

Baina Alemania eta Europa Iparraldeko beste herrialde batzuk ere horren kontra daude. Azaldutako neurri horietako gehienek, finean, Europa Iparraldeko herrialdeek diru gehiago jartzea dakarte Hegoaldekoak erreskatatzeko. Euroguneko herrialde aberatsenetako herritarrei esaten ez bazaie euren onerako ere badela, Euroguneak iraun dezan, normalena litzateke esatea ez dutela nahi euren dirua eman greziarrek eraman dezaten.