Mundua -
Japonia
Japoniako lehen ministroak kargua utziko du, osasun arrazoiengatik
Oraindik ez dago argi Abek noiz utziko duen agintea, baina 2021eko irailean amaitu behar zen bere agintaldia. Ez da kargua utzi behar duen lehen aldia.
Agentziak | Erredakzioa
Shinzo Abe Japoniako lehen ministroak kargua uzteko asmoa du, izan ere, ez du nahi bere osasun arazoen ondorioz politika nazionalak okerrera egin dezan, NHK telebista publikoak ostiral honetan jakitera eman duenez.
Bere osasun egoerari buruzko espekulazioak nabarmen areagotu dira azken egunetan, lehen ministroak hiriburuko ospitale batera egin berri dituen bisiten ondoren eta osasun arazoei buruzko zenbait informazioren harira.
Oraindik ez dago argi Abek noiz utziko duen agintea, baina 2021eko irailean amaitu behar zen bere agintaldia.
Testuinguru horretan, Japoniako lehen ministroak gaur bertan jakinarazi dezake bere erabakia, 17:00etan (08.00 GMT) eskainiko duen prentsaurrekoan. NHK telebistak jakinarazi duenez, Abe PLD alderdiko buruzagiekin bildu da kazetarien aurrean egingo duen agerraldi horren aurretik.
Hilaren 17an eta 24an, osasun arloko langileek hiriburuko ospitale batean artatu zuten Abe, azterketa medikoak egiteko, baina bere bozeramaileek behin eta berriz esan zuten ez zela ezer serioa eta haren osasun egoera ona dela.
Dena dela, Japoniako hedabideek gogora ekarri dutenez, Abek amaitutzat eman zuen lehen ministro gisa jardun zuen lehen agintaldia, 2006 eta 2007 urteen artean, garai hartan pairatzen zuen kolitis ultzeradun kronikoaren ondorioz.