NATOk beste pauso bat eman du misilen kontrako babeserako sistemarekin

NATOren misilen kontrako babes-sistema erabat amaituta dagoenean radarrez osatutako sistema bat izango da, aurkako edozein misil berehala antzemateko gai izango da eta misilen kontrako misilez osatuta dagoen sistema ere izango da eraso egiteko koheteak airez geldiarazi ahalko dituena.

Teorian, erasoa Ekialdetik iritsiko da, kalitate oneko misilak eraikitzen ari diren herrialdeetatik, printzipioz arerioak diren herrialdeetatik, Iran edo Ipar Korea bezala. Horrexegatik defentsaren lehen lerroa Europa Ekialdean kokatuko da. Turkian radarrak jarriz eta misilen aurkako misilak, berriz, Errumanian eta Polonian.

Defentsaren bigarren lerroa, berriz, itsasontzietan kokatuko da eta paper garrantzitsua jokatuko du hor, hain zuzen, Cadizen dagoen Rotako itsas-baseak. Espainiako gobernuak atzo iragarri zuenez AEBek lau itsasontzi ezarriko dituzte Rotan misilen kontrako sistemarekin. Itsasontzi hauek misilei aurre egiteko duten sistema ez da ehuneko 100 eraginkorra. Erasoa misil bakar baten bidez egiten bada, hau antzemateko aukerak handiak dira, baina aldi berean hainbat misil jaurtiz gero bakarren batek sistemen gainetik pasatzea lortuko du.

Hori kontuan izanda, babes-sistema honen papera ez da militarra soilik izango, baita politikoa ere. Aliantza Atlantiarreko barne kohesioa sendotu egin nahi da bertako kideak proiektu estrategiko berri batean sartuz. Horrek Moskurekiko harremanak konplikatzen dituen arren. Europa Ekialdean misil armategi handia duen herrialde bakarra Errusia da. Errusiarrek ez dute erabat sinesten misilen kontrako babes-sistemaren helburua Irango misiletatik babestea denik, horren atzean Errusiaren boterea murrizteko beste ahalegin bat dagoela uste dute.