Mundua -
Ministroen kontseilua
Italiak ez du EBk exijitutako erreformen inguruan akordiorik lortu
Ministroen Kontseiluak ez du pentsioen sistemaren erreforma adostea lortu, Ipar Liga alderdiko kidea, erretiro adina 65 urtetik 67 urtera atzeratzearen kontra azaldu da.
Erredakzioa
Italiako Ministroen Kontseiluak erretiro adina 65 urtetik 67 urtera atzeratzea jasotzen duen pentsio sistemaren erreformaren inguruan ez du akordiorik lortu. Berlusconiren Gobernuko kidea den Ipar Liga alderdia erretiro adina atzeratzearen kontra agertu da.
Umberto Bossi buru duen alderdiak Ministroen Kontseilua baino lehenago jakinarazi du erretiro adina atzeratzearen kontra dagoela, erretiratuen sektoreak egungo finantza krisian bere zatia ordaindu duela argudiatuta. "Ipar Liga beti egon da erretiro adina atzeratzearen inguruko eztabaidaren kontra", esan du bilera baino ordu batzuk lehenago Marco Reguzzoni alderdi horrek Parlamentuan duen bozeramaileak.
Ministroen Kontseilu bilera arratsaldeko 18:00etan hasi da eta hiru bat ordu luzatu da, azkenean ez dute akordiorik lortu eta hortaz erreformaren onespena atzeratu egin da.
Silvio Berlusconik, akordio batera heltzeko zailtasunak ikusita, hainbat ministrorekin bildu da gauean, tartean Umberto Bossi Ipar Ligako liderra, erreformaren inguruan adostasun bat lortzeko helburuarekin.
Litekeena da gaur asteartea bilerak jarraitzea, izan ere Berlusconik bihar Europako goi-bileran aurkeztu nahi du erreformen inguruko txostena, eta hortaz oraindik egun bateko epea du akordioa lortu ahal izateko.
