Mundua -
Izmiten
Turkiako segurtasun-indarrek ferry baten bahitzailea hil dute
'Kartepe' ontzia ostiralean bahitu zuten, 18:30ean, Izmitetik Golcukera abiatu eta gutxira, 18 bidaiarirekin eta sei tripulatzailerekin.
Erredakzioa
Turkiako segurtasun-indarrek 24 pertsona zeramatzan ferry bat bahitu zuen gizona hil dute. Izmiteko Golkoan zihoanean izan zen bahiketa, Turkiako ipar-mendebaldean, Huseyin Avni Mutlu Istanbuleko gobernadoreak jakitera eman duenez.
Mutluk azaldu duenez, tripulazioa eta bidaiariak onik daude, eta lehergailuak zeramatzan bahitzailea nor den oraindik ez dutela zehaztu gaineratu du.
Ordu batzuk lehenago Turkiako Garraio ministroak adierazi duenez, ontzian bost bahitzaile zeuden eta Kurdistango Langileen Alderdiko (PKK) kide ziren. "Talde terrorista batekoak direla pentsatzeko informazioa dugu", esan du ministroak, PKKri aipamen eginda.
Kocaeli probintziako 'Kartepe' ontzia ostiralean bahitu zuten, 18:30ean, Izmitetik Golcukera abiatu eta gutxira, 18 bidaiarirekin eta sei tripulatzailerekin.