Alemaniaren aurkako finantza ofentsiba

Burtsen eta zorraren merkatuaren lehen erreakzioak erakusten du joan den astean Europar Batasunak egindako goi bilerak huts egin duela. Iragarritako neurriek ez dute Europako herrialde gehienen zor publikoaren kontrako erasoaldia gelditzea lortu. Zergaitik? Ba iragarritako neurriek eragin positiboak izan ditzaketelako epe ertainera baina epe motzera kaltegarriak ere izan litezke.

Merkelek eta Sarkozyk bultzatutako itunak diziplina fiskalean jartzen du indarra, baina ez du ekonomia suspertzeko neurririk aurreikusten. Gainera, diziplina fiskal horrek atzeraldira eraman ditzake Europako hainbat ekonomia, eta ekonomia hazten ez bada ez da zorrak ordaintzeko errekurtsorik sortzen. Horregatik diru merkatuak Europako zor publikoarekin mesfidati daude. Geroz eta argiago dagoena zera da nazioarteko inbertsio fondo handiek modu batera edo bestera Alemaniari dirua atera nahi diotela.

Alemaniak atzera egitea nahi dute, honek Europako Banku Zentralari baimena ematea zailtasunak dituzten herrialdeen zor publikoa erosi dezan eta bidebatez argi berdea ematea eurobonuen jaulkipenari. Neurri guzti horiek azkenean ondorio bat dute: Alemaniak diru gehiago jarri behar duela mahai gainean. Guzti honekin argi geratu dena: merkatuek gobernuek baino indar handiagoa dutela eta modu honetan Alemaniari dirurik ateratzen ez badiote beste modu batera aterako diote: Euroa debaluatuz edo Euroa lehertaraziz.