Txina Afrikara heldu da

Sudanen eta Egipton langile txinatarrak bahitu izanak gaurkotasunera ekarri du Txinak Afrikan duen presentzia. Afrikako ia herrialde guztietan txinatarrak dira errepide eta eraikin handiak egiten ari direnak. Gainera, produktu txinatarrek merkatu garrantzitsua dute Afrikan Mendebaldekoak baino merkeagoak direlako.

Txinak Afrikarekin duen salerosketa 5 bider hazi da azken 10 urteotan. Hu Jintao Txinako presidenteak asko bidaiatu du Afrikako herrialdeetara eta inbertsio handiak agindu ditu. Propaganda egiteko bere azken ekimena Etiopiako Addis Abeban eraiki duten Batasun Afrikarreko egoitza oparitzea izan da.

Afrikako lehengaiak dira batez ere Txinari interesatzen zaizkionak, horien beharra baitu garapen ekonomikoaren bidean aurrera egiteko. Sudan, esaterako, Txinaren petrolio hornitzaile nagusienetakoa da une honetan eta han segitzen dute bahituta 29 langile txinatarrek; Egipton bahituta zeudenak, aldiz, aske utzi dituzte jada.

Egin diren kalkuluen arabera, guztira 800.000 langile txinatar daude Afrikan barrena. Mendebaldekoek Afrikan utzi duten hutsunea betetzera etorri da Txina eta ederki baliatu da potentzia ekonomiko garrantzitsu modura sartuz.