Mundua -
Iruzurrei aurre egiteko
Errusiako hauteskundeak zainduko dituzten kamerak 'hackeatu' dituzte
Zabaldutako iruzur zurrumurruei aurre egiteko asmoz, boza emateko estazioen grabazioa Putinek sustatuko neurria da. Hala ere, horrek hauteskundeen gardentasuna ez duela bermatuko uste du oposizioak.
Erredakzioa
Vladimir Putin Errusiako lehen ministroak sustatutako hauteskundeak zaintzeko kamera sareari eraso egin dio hackerrek osatutako talde batek, Ilia Masuj Errusiako Komunikazioen Ministerioko arduradunordeak zabaldu duenez. Zabaldutako iruzur zurrumurruei aurre egiteko asmoz abian jarritako neurria da kamera-sarea.
Horrela, 182.000 kamera jarri dituzte boza emateko 91.000 ikastetxeetan. Novosibirsk herrialdean, Siberian, jarritako kamerak zuzenean emititzen hasi dira www.webvybory2012.ru webgunearen bitartez. Putin horren inaugurazioan izan da ostiral honetan.
"Mehatxuen izaera ezagutzeko webgune hau jarri dugu abian", azaldu du Masujek. Halaber, "garrantzitsuena mekanismo honek kale egin ez izana da, erasoak dagoeneko izan baitira", azpimarratu du Putinek.
Hala ere, Masujek adierazi duenez, boza emateko 4.000 zentro inguruk ezin izango dute zuzenean emititu, oso urrun daudelako. Masujen arabera, "munduko hauteskunde garbienak izango dira eta Errusiak lezio bat eskainiko dio munduari".
Errusiako Gobernuak 13.000 milioi errublo (330 milioi euro) inbertituko ditu zaintza sistema honetan. Azken garaietan Putinen aurkako manifestazioak nonahi zabaldu dira Errusian, Parlamenturako azken hauteskundeetan izandako iruzurra salatzeko. Hala ere, neurri hauek hauteskundeen gardentasuna ez dutela bermatuko uste du oposizioak.
