Mundua -
HAUTESKUNDEAK FRANTZIAN
Frantzia Intsumisoak eta Alderdi Sozialistak programa akordioa lortu dute hauteskunde legegileei begira
Akordioak akordio, negoziatzen jarraituko dute. Izan ere, hainbat kontu dituzte oraindik adosteko, tartean, ekaineko hauteskunde legegileetara bakoitza bere aldetik ala koalizioan aurkeztuko diren.
EITB MEDIA
Presidentea aukeratzeko hauteskundeak egin berritan eta ekaineko hauteskunde legegileei begira, Frantzia Intsumisoak eta Alderdi Sozialistak programa akordioa lortu dute. Oraindik hitz egiten jarraituko dute, besteak beste, hauteskundeetara nola aurkeztuko diren erabakitzeko. Dena dela, itxura guztien arabera, ezkerreko blokea gertuago dago orain eta oso litekeena da ekologistak eta komunistak ere akordio horretara batzea.
Alderdi Sozialistak ohar bidez jakinarazi duenez, babestu egiten ditu Jean-Luc Melenchonen alderdiak hauteskunde legegileetarako programan egindako proposamenak, tartean, 1.400 euroko gutxieneko soldata ezartzea, erretiro adina 62 urtetik 60ra jaistea, Bosgarren Errepublikatik seigarrenera igarotzea eta Europar Batasuneko zenbait arau ez errespetatea.
Programan bat etorri arren, bi aldeen arteko negoziazioak ez dira oraindik amaitu. Hainbat kontu adostu behar dituzte, tartean, ekaineko hauteskunde legegileetara bakoitza bere aldetik ala koalizioan aurkeztuko diren.
Itxura guztien arabera, ezkerreko blokea gauzatzeko aukera gertuago dago orain. Ekologistak eta komunistek ere zer egin erabaki beharko dute.
Ekologistak akordiotik gertuago
Azken orduetan, ekologisten eta Frantzia Intsumisoaren jarrerak gerturatu egin dira.
Julien Bayou, Frantziako alderdi berdeko bozeramaileak France 2 telebista katean egin dioten elkarrizketan azaldu duenez, akordioa gertu dago eta litekeena da datozen orduetan negoziazio horiek konpromiso batean gauzatzea.
