Mundua -
TIROKETA AEB-N
Gutxienez 10 lagun hil ditu motibazio arrazista izan zezakeen gazte batek Buffalon
Gorroto delitu gisa ari da tiroketa ikertzen Polizia. 18 urteko gazte zuri bat atxilotu dute ustezko hiltzaile gisa eta epaiketa azkarra egiteko prozesatu dute.
AGENTZIAK | EITB MEDIA
Gutxienez 10 pertsona hil eta hiru zauritu dituzte Buffaloko supermerkatu batean (New Yorkeko estatua), izandako tiroketa batean, Ameriketako Estatu Batuetako iparraldean, CNN telebista kateak jakitera eman duenez.
Susmagarri nagusia, Payton S. Gendron, supremazista zuri gisa identifikatutako 18 urteko gaztea, atxilotu eta epaiketa azkar batean auzipetu dute dagoeneko, New Yorkeko estatuko kargurik altuena den lehen graduko hilketa egotzita. Errudun joz gero, biziarteko kartzela-zigorra ezarriko diote. Iturri batzuek diote asteartean eramango dutela epailearen aurrera, eta beste batzuek ostegunean.
Poliziako baieztatu duenez, gaztea larunbateko 14:30ean (AEBn) iritsi zen Buffaloko supermerkatu horretako aparkalekura, "arma asko zituela". Ibilgailutik jaitsi eta Twitch plataformaren bidez zer egin behar zuen zuzenean transmititzen hasi ondoren, bere autoaren inguruan zeuden lau pertsona tirokatu zituen.
Ondoren, supermerkatuan sartu eta segurtasun zaindariari tiro egin zion, gero barruan tiroka jarraitzeko, 13 pertsona zauritu arte. Handik gutxira, Buffaloko Poliziako agenteek atxilotu eta komisariara eramatea lortu zuten.
Aurrez pentsatutako erasoa dirudi
Agintariek adierazi dutenez, atxilotua ez da inguru horretakoa. Distantzia handira bizi da eta autoz bidaiatu ondoren iritsi zen bertara. Antza denez, beltz asko bizi diren auzoa delako aukeratu zuen lekua.
Buffaloko Poliziak 180 orrialdeko gutun bat partekatu du (susmagarriak idatzi zuela uste da), non "elite politikoek biztanleria zuria murrizteko immigrazioa erabiltzen dutela dioen ordezkapen handia" izeneko konspirazio-teoria deskribatzen den, The Wall Street Journal egunkariak jakinarazi duenez.
Joe Biden AEBko presidenteak babes osoa adierazi die biktimen familiei, eta ordena publikoko indarren "ausardia" ere eskertu du.
18 urteko gaztea tiroketa egitera eraman duten arrazoien inguruan, poliziak ikerketa amaitu arte itxaron nahi duela esan du Bidenek baina Estatu Batuen egiturarentzat gorroto-krimen bat "higuingarria" dela adierazi du.
"Etxeko terrorismoaren edozein ekintza, ideologia supremazista zuri nazkagarri baten izenean egindako ekintzak barne, Estatu Batuetan irudikatzen dugun guztiaren antitesia dira. Gorrotoak ez du espaziorik izan behar. Gure esku dagoen guztia egin behar dugu gorrotoak elikatutako barne terrorismoarekin amaitzeko", gaineratu du Bidenek.