Mundua -
TRAFIKO ISTRIPUA
Gutxienez 12 erromes poloniar hil dira eta 31 zauritu, Kroazian izan den autobus istripuan
Zagrebetik gertu, 40 bat kilometrora, izan da ezbeharra gaur goizean. Lehen hipotesien arabera, gidariak lo hartu du gidatzen ari zela.
AGENTZIAK | EITB MEDIA
Gutxienez 12 pertsona hil dira eta beste 31 zauritu -batzuk egoera kritikoan daude- , gaur goizean Zagrebetik gertu izandako autobus istripu larrian.
Kroaziako Larrialdietako iturriek HRT kate publikoari adierazi diotenez, Poloniatik abiatu zen autobusa eta Hungariako muga zeharkatu ondoren, Zagrebetik 40 kilometrora izan du istripua, 05:40 aldera. Autobusean erromes talde bat zihoan, Varsoviatik gertu dagoen herri batetik abiatu eta Medjugorjeko santutegi marianoa bisitatzera zihoana, Bosnia-Herzegovinako hegoaldean.
Suhiltzaileek, poliziak eta larrialdietako taldeek bidaiariak erreskatatu eta Varazdin eta Zagrebeko ospitaleetara eraman dituzte.
Autobuseko gidariak lo hartu duela uste dute ikertzaileek baina erabakigarria izango da ondorengo orduetako ikerketa sakona, zer gertatu den erabat argitzeko.