Mundua -
Gobernuaren kontrako protestak
Iranek Moralaren Polizia desegin du
Beloa txarto jarrita eramateagatik atxilotu zuen Moralaren Poliziak Mahsa Amini gaztea, eta, haren zaintzapean zegoela, hil egin zen, Poliziak eragindako kolpeek jota. 400 pertsonatik gora hil dira azken hilabeteetan Aminiren hilketak piztutako protestetan.
AGENTZIAK | EITB MEDIA
Herritarren arropen egokitasuna zaintzen eta Errepublika Islamikoak ezarritako kodeen arabera janzten ez ziren emakumeak bereziki atxilotzen zituen Moralaren Polizia ezabatu du Irango Gobernuak, Mohamad Yafar Montazeri fiskal nagusiak iragarri duenez.
ISNA albiste agentziak jaso duenez, fiskalak zehaztu du Polizia horrek ez duela "loturarik Botere Judizialarekin". Izan ere, aurreratu duenez, epaileek jarraituko dute zaintzen Irango herritarren portaerak, eta emakumeen arropen garrantzia azpimarratu du, batez ere Qom hiri santuan (Teherango hegoaldean). Mundu osoko erromesek eta seminaristek bisitatzen duten hiria da Qom. Adituek diotenez, herri-protestaren mugimenduari egindako keinua litzateke Moralaren Polizia ezabatzearen erabakia.
"Hau iraultza bat da"
Mahsa Amini, 22 urtekoa, irailaren 16an hil zen, Teherango Moralaren Poliziak hiru egun lehenago atxilotu ondoren, belo islamiarra gaizki jarrita zeramala iritzita. Ordutik, Iran sutan dago, erregimenaren aurkako protestetan murgilduta. Errepublika Islamikoaren amaiera ere aldarrikatu dute manifestariek.
Iran Human Right GKEaren arabera, 448 pertsona hil dira errepresio polizialaren ondorioz, eta gutxienez, 2.000 atxilotu dituzte, hainbat delitu egotzita. Horietatik seiri heriotza-zigorra ezarri diete.
