Mundua -
Migrazioaren drama
34 migratzaile desagertu dira Tunisiako kostaldean ontzi bat hondoratuta
Gainera, beste 25 pertsona zeramatzan beste ontzi bat ere hondoratu da Tunis parean. Kasu horretan, guztiak onik erreskatatu dituzte, bat izan ezik, haurtxo bat, hain zuzen ere. Aurten 469 migratzaile galdu dira Mediterraneo itsasoan; horietatik 54, umeak.
AGENTZIAK | EITB MEDIA
34 pertsona desagertu dira ostiral honetan Tunisiako kostaldean ontzi bat hondoratuta, eta bertan zihoazen lau pertsona erreskatatzea lortu dute, Sfaxeko auzitegiko bozeramaile batek aditzera eman duenez. Saharaz hegoaldeko herrialde desberdinetatik zetozen migratzaileak, eta Italiara iristea zuten helburu, ANSA Italiako agentziak kaleratu duenez.
Bestalde, beste 25 pertsona zeramatzan beste ontzi bat ere hondoratu da Tunis parean, Mediterraneoa igarotzen saiatzean. Guztiak onik erreskatatu dituzte, bakar bat izan ezik, haurtxo bat, hain zuzen ere.
2023 honetan 469 migratzaile hil edo desagertu dira Mediterraneo itsasoan, horietatik 54 ume izanda, Desagertutako Migratzaile Proiektuak zabaldutako datuen arabera. Gainera, 2014az geroztik, 26.227 migratzaile desagertu dira, eta horietatik 20.658k Mediterraneoaren erdiko bidea erabili zuten.
