Mundua -
Pentsioak
Macronek esan du erreforma "beharrezkoa" zela eta "itun soziala" proposatu die sindikatuei eta enpresei
Frantziako presidenteak aitortu du gizarteak "justizia soziala" nahi duela, eta dei hori "entzuteko prest" dagoela nabarmendu du.
AGENTZIAK | EITB Media
Emmanuel Macron Frantziako presidenteak adierazi du erretreten erreforma "beharrezkoa" zela defizitak gora egitea galarazteko, eta "itun sozial berria" proposatu die sindikatuei eta enpresaburuei langileen baldintzak hobetzeko.
Macronek hitzaldia eman du telebistan, pentsioen erreformak piztutako polemika handiaren erdian, eta ohartarazi du bere gobernuak egindako aldaketak "erantzun bakarra" zirela pentsiodunen eta bizi-itxaropenaren hazkundearen aurrean.
Era berean, aitortu du gizarteak "justizia soziala" eta "politika biziberritzea" nahi duela, eta aldarri horiek "entzuteko prest" dagoela nabarmendu du. "Erantzuna ezin dira izan immobilismoa edo estremismoa", esan du. Hori dela eta, "itun sozial berria" proposatu die sindikatuei eta enpresaburuei.
