Mundua -
sudan
Sudango Armadak eta RSFek su-etena hautsi dute Jartumen egindako erasoen ostean
Bi alderdietako buruzagiek zazpi eguneko su-etena egitea adostu zuten, maiatzaren 4an hasita. Hots, akordioa indarrean sartu eta ordu gutxitara apurtu dute.
eitb media
Sudaneko Armadaren eta RSF talde paramilitarraren artean liskarrak egon dira Jartum hiriburuan, su-etena indarrean sartu eta ordu gutxitara. Printzipioz, zazpi eguneko tregoa iragarri zuten. Antzeko ekimenek porrot egin dute apirilaren 15az geroztik; izan ere, trantsizio-prozesuan aurrera egiteko elkarrizketa-prozesu baten erdian borrokak eztanda egin zuen bi indarren artean.
Pasa den igandean, apirilak 30, Sudango Indar Armatuen buru eta Trantsizioko Kontseilu Subiranoaren presidente Abdelfata al Burhanek eta RSFen buru Mohamed Hamdan Dagalok "hasiera batean" oniritzia eman zioten maiatzaren 4tik 11ra arteko su-etenari, Hego Sudango Gobernuak jakinarazi zuenez.
Gai Humanitarioetarako Nazio Batuen idazkari nagusiaren adjuntuak, bere aldetik, liskarren amaiera lortzea zaia izango dela esan du, bi aldeek "aurrera egiteko" nahia erakusten dutelako.
RSFek hiriburuan dituzten posizioei eraso egin dietela salatu du ohar baten bidez Sudaneko Armadak. Bestalde, RSFek gogor kritikatu dituzte indar kolpisten ekintza arduragabeak, su-etena urratzeagatik. "Gure indarrei eraso diete hainbat lekutan", nabarmendu dute.
Apirilaren 15ean egin zuten eztanda liskarrek, RSFak Indar Armatuen barruan sartzearen inguruko tentsioak areagotu zirenean, zeina gobernu zibil berri bat osatzeko abenduan sinatutako akordioaren giltzarria zen. Baita, Al Bashir boteretik kendu ondoren irekitako trantsizioa suspertzeko ere, 2021eko urriko estatu-kolpearen ondotik.