Mundua -
Ameriketako Estatu Batuak
"Oso konfidentzialak" diren agiriak esku artean dituela onartzen du Trumpek audio batean
"Honek nire auzia irabazten du, badakizu? Oso konfidentziala dela kenduta", esan zuen AEBko presidente ohiak, 2021eko uztaileko audio batzuetan, Iran inbaditzeko Washingtonen ustezko egitasmo bati buruzko artxibo batzuei erreferentzia eginez.
Agentziak | EITB Media
CNN telebista kateak Donald Trump Ameriketako Estatu Batuetako presidente ohiaren audio bat argitaratu du, eta bertan "oso konfidentzialak" dokumentuak dituela onartzen du.
"Honek nire auzia irabazten du, badakizu? Oso konfidentziala dela kenduta", adierazi zuen Trumpek 2021eko uztaileko audio batzuetan, Iran inbaditzeko AEBko ustezko plan bati buruzko artxibo batzuei erreferentzia eginez.
"Presidente gisa desklasifikatu nitzakeen. Orain ezin dut, badakizu, baina hau sekretua da oraindik", gaineratu zuen agintari ohiak, Iranekiko gerra egitasmoak Etxe Zurira iritsi aurretik ere existitzen zirela frogatzen saiatzen ari zela.
"Adibide bat emango dizut. Berak esan zuen nik Iran eraso nahi nuela. (...) Hau aurkeztu zidaten (hau estraofiziala da). Hau berea zen. Hau bai harena bai Estatu Batuetako Defentsa Departamentuarena zen. (...) Hori ez nuen nik pentsatu", aitortu zuen Trumpek grabazio batzuetan, CNNren arabera.
Agintari ohiak behin eta berriz ukatu du gaizki jokatu izana, eta "prozesu formaletik igaro gabe aldebakarrez desklasifikatutako" dokumentuak izateko eskubidea zuela ere esan du.