Mundua -
Migrazioa
41 migratzaile hil dira Mediterraneoan, itsasontzia urperatuta
Bizirik atera diren lau pertsonek Lampedusako (Italia) kostaldean dauden erreskate zerbitzuei azaldu dietenez, euren ontzia Tunisiatik atera da.
Agentziak | EITB Media
41 migratzaile hil dira Lampedusa uharteko kostaldean, Italian, euren itsasontzia hondoratuta, ANSA agentziak zabaldutako albistearen arabera.
Erreskatatutako pertsonak shock egoeran daude. Azaldu dutenez, Sfaxetik (Tunisia) atera zen ontzia, eta itsasoan sei ordu inguru eman eta gero, olatu handi baten ondorioz irauli zen. Tokiko hedabideen arabera, 41 biktimak, tartean hiru haur, uretara erori ziren.
Migratzaileak Lampedusatik Italiako penintsulara eramaten hasi ondoren, lehorreratzeek ez dute etenik bertan. Gaur egun, 1.500 pertsonatik gora daude pilatuta 300 lagun hartzeko prestatutako harrera-zentroan.