Poliziak tiratzailearen etxean aurkitutako lehergaiak indargabetu ditu

Denverren (AEBetan) ostiral honetan zinema-areto batean jazotako tiroketaren ustezko egilearen etxean aurkitutako lehergai guztiak indargabetu dituzte agenteek eta lehergailu-teknikariek.

Isolatuta

Halaber, Grayson Robinson Araphoe konderriko sheriffek azaldu duenez, espetxean beste presoengandik isolatuta mantenduko dute Jean Eagan Holmes, beste presoen balizko mendekua saihesteko.

Bestalde, Michael Dobersen konderriko koronelak 12 hildakoen izen-abizenak jakitera eman ditu. Haien artean, 6 urteko neskato bat eta 18 urteko gazte bat daude. Gainontzeko hamar hildakoak 23 eta 32 urte bitartekoak dira. "Guztiei autopsia egin diete, eta guztiak tiroek eragindako zauriengatik hil ziren", azpimarratu du.

Obamaren bisita

Bestalde, Barack Obama AEBetako presidentea Aurora herrialdean izango da igande honetan, biktimen senitartekoei doluminak adierazteko, Etxe Zuriak zabaldu duenez.

Obamak "krimen ikaragarri" hau gaitzetsi du dagoeneko, eta justizia arloan Gobernuak laguntza eskainiko duela hitza eman du. "Gertatutakoa nola jazo den eta erantzulea nor den jakin arren, ez dugu inoiz ulertuko nola da posible lagun batek halako sarraskia egin izana. Halako maltzurkeria ulertezina da", esan du Obamak.

Armategi handia

Halaber, Poliziak gaztearen etxebizitza miatu du, eta Interneten erositako 6.000 bala eta lehergailuak egiteko material ugari atzeman ditu, Dan Oates Aurora herrialdeko poliziaburuak aditzera eman duenez. Holmes astelehenean eramango dute epaitegira.

Bertako Poliziak armategi handia atzeman du Holmesen etxean: Interneten erositako 6.000 bala, errifleentzako hainbat kargadore, metrailadore zehatz batzuentzako danbor borobila eta kable kopuru handia, tranpak egiteko burdin haria, munizio ugari ontzietan eta likidoz betetako hainbat pote.

Poliziaburuak azaldu duenez, "ez dugu horrelakorik inoiz ikusi". Hala ere, Oatesek esan duenez, "legea hautsi gabe" lortu zituen Holmesek arma guztiak.

"Oraindik arrisku handiak daude etxebizitza barruan", esan du polizia batek. "Hurrengo orduetan hemen jarraituko dugu frogak bildu eta arriskuak txikitzeko", gaineratu du.

Hamaika zauritu, oso larri

Ostiral honetan izandako tiroketan 12 lagun hil eta beste 70 zauritu dira. Horietatik, 11 oso larri daude, John Hickenlooper Coloradoko gobernadoreak azaldu duenez.

Poliziaburuak Holmesen oldarkortasuna azpimarratu du. Izan ere, tiro batzuk ondoko eraikin batzuetara iritsi ziren, eta, ondorioz, zinema-aretoaren ondoan bizi den herritar batek bala bat jaso zuen eta, egun, ospitaleratuta dago, CBS AEBetako telebista-kateak jakinarazi duenez. "Edonork tiroren bat jaso zuen", azaldu du kate honek.