Albiste izango dira: Marea biziak, Libanoko erasoak, eta Edmundo Gonzalezen aintzatespena

Honako gai hauek hartuko dituzte gaur, 2024ko irailaren 19an, hedabideetako lerroburu nagusiak:

- Marea biziak: AZTI Itsas eta Elikagaien Ikerketa Zentroak ohartarazi du marea bizi oso altuak egongo direla aste honetan euskal kostaldean. Itsasgora 18:23an izango da, 5,12 metroko marearekin, eta, beraz, ordu horretan itsasaldiek sarri jotzen dituzten eremuetan gainezka egin dezake urak. Hori dela eta, Eusko Jaurlaritzako Segurtasun Sailak abisu horia ezarri du gaur, 17:00ak eta 20:00ak bitartean, itsasaldeko arriskuagatik.

- Libanoko erasoak: Komunikazio dispositibo gehiago lehertu dira Libanon, eta gutxienez 14 hildako eta 450 zauritu izan dira. Sare sozialetan zabaldutako irudien arabera, walkie-talkieak izan dira eztanda egin duten gailuak. Bezperan, gutxienez 12 pertsona hil eta 1.800 baino gehiago zauritu ziren, aurrekaririk gabeko eraso batean. Izan ere, Hezbollahko kideek zituzten ehunka gailu elektronikok (pertsona-bilagailuak, antza) eztanda egin zuten aldi berean. Israelek berretsi du armadaren "operazioen erdigunea" iparraldeko mugara mugitzen ari direla. "Gerra fase berri batean" sartu dela adierazi du, baina Libanon izandako leherketen inguruan ezer esan gabe.

- Edmundo Gonzalez aintzatestea: Europako Parlamentuak gaur bozkatuko du Edmundo Gonzalez hauteskundeetako irabazletzat hartzen duen ala ez. Europako Parlamentuaren lehen erabaki politikoa izango da uztailaren 28ko hauteskundeen ondoren. Orain arte, Europar Batasunak ez du Nicolas Maduroren garaipena onartzen ezta Gonzalezena ere, eta Venezuelako hauteskunde batzordeak aktak argitaratzeko zain dago.