Bi ustezko 'terrorista' atxilotu dituzte Heathrow aireportuan

Bi pertsona atxilotu dituzte bart Londreseko Heathrow aireportuan ustezko "terroristak" direlakoan, bertako Poliziak jakitera eman duenez.

26 urteko gizonezko bat eta emakumezko bat dira atxilotuak, eta Egiptotik iritsi bezain laster atzeman zituzten.

Britainia Handiko hedabideen arabera, Londresetik Siriara ustezko jarduera terroristetan parte hartzera joaten direnen inguruko ikerketa baten barruan egin dituzte atxiloketa hauek.

Oraindik ez dago argi Egiptotik Siriara bidean zihoazen ala Siriatik atera, Egipton eskala egin, eta Londres ote zuten helmuga.

William Hague Atzerri Gaietarako ministroak BBCn azaldu duenez, badaude herritar britainiarrak Siriara joan eta "terrorismo" ekintzak egin nahi dituztenak.