Bost haurren gorpuak aurkitu dituzte Txinako edukiontzi batean

Bost haurren gorpuak aurkitu dituzte edukiontzi batean, Txinako hego-ekialdeko herri batean, Xinhua agentziak adierazi duenez. Bertako iturrien arabera, itota hil dira.

Ez dute baztertzen hotzetik babesa hartzeko 10 urte inguruko haurrak edukiontzi barrura sartu izana, baina hilketaren hipotesia ere ez dute baztertzen.

Bijie hiriko edukiontzi batean zaborra bilatzen ari zen gizonezko batek topatu zituen gorpuak. Edukiontziak tapa hermetikoa du eta interneteko argazkien arabera, 1,5 metroko luzera eta 1,3ko zabalera du.

Guizhou probintziako herrixka horretan zeroz azpiko sei gradu izan zituzten joan den ostiralean, haurrak hil ziren egunean.