Politika -
Bilera sorta
Podemos Euskadi EH Bildurekin batzartuko da gaur
Oraingoz EAJrekin bakarrik bildu da, eta gaurko bileraren ostean, PSE-EErekin hitzordua jartzea espero du.
agentziak | erredakzioa
Podemos Euskadi EH Bildurekin batzartuko da gaur, alderdi moreak EAEko alderdi politikoekin abiatu duen bilera sortaren baitan, EAJrekin bildu eta egun batzuetara.
Bilera 11:00etan izango da, EH Bilduk Bilboko Buenos Aires kalean duen egoitzan, eta Nagua Alba idazkari nagusia, Lander Martinez Antolakuntza idazkaria eta Eduardo Maura diputatua izango dira Podemosen ordezkariak. EH Bilduk, berriz, Hasier Arraiz, Oskar Matute eta Oihane Zabaleta bidaliko ditu.
Bileraren ostean, adierazpenak egingo dituzte alderdiek. Podemosek behintzat hala iragarri du.
Gaurkoaren ostean, Podemosek PSE-EErekin bildu nahi du, eta hitzordua lehenbailehen adostea espero du.
