Manifestazio batek III. Errepublika eskatuko du Donostian larunbatean

Mugimendu Errepublikanoak manifestazio bat deitu du larunbaterako Donostian, xede izanik III. Errepublika eskatzea. Egun hauetan, hain zuzen, 85 urte bete dira Espainiako II. Errepublika aldarrikatu zutenetik; egungo sistema, aldiz, "agortuta dago, ez da bidezkoa, eta gabezia handiak ditu", antolatzaileen esanetan.

Ohar batean, Mugimendu Errepublikanoak salatu du Trantsizioak sortutako Estatu eta Gobernu eredua "hautsita" dagoela; izan ere, 1978ko Konstituzioak hainbat eskubide ezartzen ditu, baina, hala ere, "batzuk ez ditu inork bermatzen", eta krisialdiaren zama familia langileek jasan behar izaten dute: "Demokrazia formala suntsitzen dute, eta merkatuen diktaduraren alde egin".

Hortaz, esan dute gaitzesten dutela sistema hau, "agortuta dagoelako, ez delako bidezkoa eta gabezia handiak dituelako"; gainera, egungo ereduak uko egiten die herritarrei euren etorkizunaren gainean erabakitzeko eskubidea.