Politika -
Nafarroa
Antsoainen ikurrina jarri izana legezkoa dela ebatzi du epaile batek
Horregatik, epaileak atzera bota du Estatuko Abokatutzak aurkeztutako helegitea.
AGENTZIAK | ERREDAKZIOA
Antsoaingo jaietan Udalak udaletxean ikurrina jarri izana ez dela lege iruzurra uste du Iruñeko administrazio-auzietarako 1. epaitegiko epaileak, eta, horrenbestez, atzera bota du Estatuko Abokatutzak jarritako helegitea, EH Bilduk jakinarazi duenez.
Hain zuzen ere, irailaren 17an jarri zuen ikurrina udalak, jaien hasierako txupinazoan.
Koalizio abertzalea pozik agertu da epailearen erabakiarekin, “urrats argia” baita “bizikidetzarako bidean”.
“Porrot egin du pertsonen sentimendu zilegiei eragiten dien kontu bat auzitara eraman duenak”, esan du, UPNri buruz, eta alderdi horri euskal banderarekin “tematuta” dagoela gaineratu du.
EH Bilduk azaldu du lan egingo duela Ikurren Legea aldatzeko, “egungo arauaren ukapenak, debekuak eta bazterketak gainditzeko”.
