Carlos Urquijo kaleko saltzaile bati disko bat erosten harrapatu dute

Carlos Urquijo Espainiako Gobernuak Euskal Autonomia Erkidegoan (EAE) duen ordezkaria kaleko saltzaile bati disko pirata bat erosten harrapatu zuten larunbatean, Bilbon.

Deia egunkariak igandean kaleratutako argazki batean, Urquijo ageri da emazte eta alabekin Bilboko Zazpikaleetan top mantako saltzaile bati disko bat erosten.

Egunkariari egindako adierazpenetan, bere "bizitza pribatua"ri dagokion kontu bat dela esan du Urquijok. Horren ustez, irudia "bere bizitza politiko eta pertsonalaren aurkako erasoa da", eta hura argitaratzea "zitalkeria" izan dela gaineratu du.

EAJk, EH Bilduk eta Podemosek Urquijoren jarrera gaitzetsi eta haren "moral bikoitza" kritikatu dute. Izan ere, Gobernuaren EAEko ordezkariak euskal administrazioen erabaki askoren kontrako helegiteak jarri ditu azken urteetan, bata bestearen atzean, "legea guztiok bete behar dugu" argudiatuta. "Orain legearen errespetu hori ez da betetzen ari", salatu dute hiru alderdiok.

Koldo Mediavilla EAJren Harreman Instituzionalerako idazkariak bere blogean idatzi duenez, "ironikoa da gaixo baten moduan legea betearazteko jarduten duen horrek legea ez betetzea, ezta bere bizitza pertsonalean ere". Mediavillaren iritzian, Espainiako Gobernuaren ordezkariak barkamena eskatu eta dagokion erakundeari espedientea zabaltzeko galdegin beharko luke, "ekintza horrek isunen bat jartzea eragin dezakeen aztertzeko".

 

Jatorrizko informazioa (DEIA)