Martxoan aztertuko dute estradizioa eragozteko Troitiñoren eskaria

Londreseko Auzitegi Nagusiak martxoan aztertuko estradizioa eragozteko Antton Troitiñoren defentsak pasa den astean igorritako ordena judiziala, gaur epaileak erabaki duenez.

Aipaturiko auzitegian gaur egin den entzunaldi teknikoan, Michael Supperstone epaileak martxoan beste bista bat egitea erabaki du. Oraindik data zehaztu ez badu ere, martxoaren 20tik aurrera egingo dela iragarri du eta bertan aldeek beren arrazoiak azaldu ahal izango dituzte.

Gaurko bistaren helburua Troitiñoren defentsak aurkeztutako ordena judiziala baimentzea edo baliogabetzea erabakitzea zen, haren abokatu taldeak baieztatu duenez. Troitiñoren espainiaratzea eragozteko egin zuen eskaria haren defentsak.

Londreseko Auzitegi Nagusiak Antton Troitiñori ukatu egin zion haren espainiaratzearen kontra Auzitegi Gorenean helegitea jartzea. Dena den, bide judizial guztiak agortuta ere, oraindik ez dute espainiaratuko immigrazio helegite bat erabakitzeke dagoelako. Immigrazio epaitegiak apirilaren 10ean emango du bere epaia.