Teknologia -
Sare sozialak
Instagram erorita egon da hainbat herrialdetan
Erabiltzaileek eman dute abisua, 09:00ak aldera, eta ordu erdi geroago goia jo du zerbitzu etenak. Oraingoz, baieztapen ofizialik ez dago.
Agentzia | erredakzioa
Instagram sare soziala erorita egon da gaur goizean munduko hainbat herrialdetan, tartean Espainiako Estatuan. Itzalaldia Europako zenbait herrialdetan, Australian eta AEBn ere igarri dute. Oraingoz, ez dago baieztapen ofizialik. Erabiltzaileek eman dute abisua, eta zerbitzu etenak atzemateko webguneek zabaldu dute berria.
Erabiltzaileek 09:00ak aldera eman dute etenaren berri, eta Down Detector eta Outage Report zerbitzu etenak atzemateko webguneek 09:30ean jaso dituzte kexa gehien.
Outage Reporten arabera, sakelako aplikazioak eman du arazo gehien (kasuen % 61). Erabiltzaileen % 15en esan dute webgunea jausita egon dela, eta % 16ek sare sozial guztia erorita egon dela esan dute. Webguneak 16.000 intzidentzia jaso ditu gaur.
Europan, Espainiako Estatuan, Erresuma Batuan, Herbehereetan eta Italian atzeman dute 'itzalaldia'. AEBn, milioika izan dira kaltedunak, mendebaldeko kostaldean gehienak.
Down Detector webguneak Instagramen itzalaldiarekin egin duen munduko mapa.
20 minutu eskasetan, 7.000 intzidentzia izan ditu Outage Report webguneak. Dena dela, 09:30etik aurrera, apurka-apurka, bere onera etorri da sare soziala.