Gizakiok Interneteko trafikoaren erdia bakarrik eragiten dugu

Interneteko erabiltzaileek sareko trafikoaren erdia baino gutxiago eragiten dute. Gainontzekoa ekintza automatikoen ondorioa da, Incapsula enpresaren ikerketaren arabera. Datuen arabera, trafikoaren % 31ren helburu nagusia webari kalte egitea da.

Enpresak bezeroen 1.000 webgunetik gora aztertu zituen, hilean gutxienez 50.000 bisita dituztenak. Emaitzek diotenez, trafikoaren % 5 informazioa lapurtzeko erabiltzen diren 'hackeatzeko' tresnekin erlazionatuta dago.

Trafikoaren beste % 5 scraper deitutakoekin lotuta dago. Tresna horiek informazioa bildu eta beste webgune batzuetan publikatzen dituzte. Oso baliagarriak dira, adibidez, data-baseak egiteko. % 2 spammersek sortzen dute, horiek garrantzi gabeko edukiak publikatzen dituzte euren produktuei publizitatea emateko.

"Trafiko gaiztoa"

Ekintza gaiztoen gainontzeko % 19 gainontzeko mugimenduek osatzen dute, programa-espioiak, esaterako. Beste % 20 programa automatiko "onek" osotzen dute; webguneetatik informazio berria etengabe biltzen dituztenak, e.a.

Gauzak horrela, Interneteko benetako erabiltzaileek espazioaren % 49 bakarrik betetzen dute.