Urtebete geroago, Steve Jobs gogoan

2011ko urriaren 5ean hil zen, 56 urte zituela, Steve Jobs Apple enpresaren sortzaileetako bat, pankreako minbiziak jota; hain justu, Apple etxeak iPhone 4S berria aurkeztu eta biharamunean.

Apple etxeko presidente ohiaren heriotzaren ondoren, Walter Isaacson kazetariak haren biografia argitaratu zuen, eta Apple Store dendak Steve Jobsen omenezko aldare bihurtu ziren. 2012. urtean zehar ere hainbat omenaldi jaso ditu eskuko telefonoen mundua irauli zuen gizonak; Hong Kongeko Madam Tussaud museoan, esaterako, Steve Jobsen irudi bat (argizariz egindakoa) dago ikusgai, eta aurrerago Madam Tussaud-en munduko beste museoetan ere ikusi ahal izango da.

Steve Jobsen ibilbide profesionala

1976an, Steve Jobs eta haren nerabezaroko Steve Wozniak lagunak Apple enpresa sortu zuten San Francisco hiriko garaje batean. Jobsek berak azaldu zuen urte batzuk geroago, izena nondik zetorkion enpresari: “Sagarrak zeuden etxalde batetik bueltan pentsatu nuen izen dibertigarria eta alaia zela”.

Steve Jobsek bi alditan egin zuen lan Apple etxean: 1976tik 1985ra bitartean eta 1997tik 2011ra. Lehen etapan, Apple I eta Apple II ordenagailuak kaleratu zituzten, eta, ondoren, Macintosh sistema eragilea zuten ordenagailuak.

1985ean, Apple enpresa utzi zuen, eta ez zen itzuli 1997. urtera arte. Apple egoera ekonomiko txarrean zegoen, eta negozio bide berriak irekitzen saiatu zen; hortik sortu zituen, iTunes musikaren denda digitala, iPod gailua eta Mac ordenagailuak, guztiak ere oso arrakastatsuak izan zirenak.

2007an hasi zen Apple etxearen benetako susperraldia, Steve Jobsek eskuko telefonoen mundua irauli zuen iPhone gailua aurkeztu zuenean, hain zuzen ere. 2011ko abuztuan erretiroa hartu zuen Steve Jobsek gaixotasunari aurre egiteko, eta Tim Cook-ek hartu zuen enpresaren gidaritza.