Telefono mugikorretarako HTML5 ikastaroa, Bilbon

HTML eta Javascrip lengoaietan ezagutza duten pertsonei zuzenduta, eta HTML5 aplikazioa telefono mugikorretan sakondu nahi duenarentzat ikastaroa antolatu da datorren azaroaren 9an, Bilbon.

Ikastaroa M4Fk eskainiko du, Internetentzako multimedia edukien ekoizleak, eta EiTBren, Vicomtechen, Tapquoren eta Swwweeten laguntza izango du. Ikastaroa zuzenduko duten pertsonak euren curriculumaren eta ibilbidearen arabera izan dira aukeratuak, guztiak egun lanean diharduten profesionalak.

Ikastaroaren helburua HTML5 aplikazioak sortu ahal izateko ezagutza teorikoa lortzea da, eta horretarako puntu ezberdinak jorratuko dira ikastaroan. Esaterako, ikasleek desktop eta mugikorretarako aplikazioak sortuko dituzte, "frameworks" erabiliz eta erabili gabe. Gainera, HTML5 aplikazioak etorkizuneko telebista adimendunean zer nolako eragina izango duen ezagutuko dute ikasleek.

Emaitzak aurkeztu daitezkeen hiru "front-ends" ezberdinak kontuan izanda antolatu da ikastaroaren egitura: Telefono mugikorra, Desktop eta HbbTV/SmartTV. Oinarrizko osagaiek hartuko dute protagonismoa hasieran, eta ikastaroak aurrera egin ahala atal ezberdinetan sakonduko da. Horrela ikastaro osoa eta egituratua lortuko da eta eskuratutako ezagutza bakoitza hurrengoetan erabili ahal izango da.

Ikastaroak 72 ordu iraungo du, gelara bertara joanda egingo direnak. Klasetik kanpo, ordea, lan praktikoak egin beharko dira, eta, amaitzeko ikastaro bukaerako proiektua egin beharko da, alegia, ikastaroan zehar ikasitakoa praktikan jarri beharko dute ikasleek guztiak biltzen dituen aplikazioa bat aurkeztuz.

HTML5 aplikazioaren lehendabiziko ikastaro hau Bilbon egingo da 2012ko azaroaren 9tik otsailaren 9ra arte, M4Fk Bilbon duen Egoitzan. Helbidea ondorengoa da: Basurtoko Kaputxinoak Kalea, 2, 48013, Bilbo. Informazio gehiago nahi izatera, edo ikastaroan izena eman nahi baduzu, sartu M4Fren webgunean.